G20, W205, B9: çka do të thonë kodet e gjeneratave
Kur na shkruan „dua një parakolp për Golf", pyetja jonë e parë është gjithmonë e njëjta: cili Golf? Jo se po e vështirësojmë punën. Sepse mes Golf 7 dhe Golf 7.5 ndryshon parakolpi, grilla dhe dritat — edhe pse makina duket njësoj nga larg.
Kodi i gjeneratës është përgjigjja e shkurtër për atë pyetje. Ja si funksionon te markat që i mbajmë.
BMW — shkronjë dhe dy numra
`E`, `F`, `G` tregojnë epokën; numri tregon modelin.
- E — gjeneratat e vjetra: E46 (Seria 3, 1998–2006), E90 (2005–2012), E60 (Seria 5, 2004–2009)
- F — gjeneratat e mesme: F30 (Seria 3, 2012–2018), F10 (Seria 5, 2010–2017), F20 (Seria 1)
- G — gjeneratat e reja: G20 (Seria 3, 2019+), G30 (Seria 5, 2017+), G05 (X5, 2018+)
Do ta shohësh edhe LCI. Do të thotë Life Cycle Impulse — rifreskimi në gjysmë të jetës. F20 dhe F20 LCI kanë grilla dhe drita të ndryshme.
Mercedes-Benz — W, C, X dhe tre numra
Shkronja tregon trupin, numri gjeneratën.
- W — limuzina: W205 (C-Class, 2014–2021), W213 (E-Class, 2016–2023), W222 (S-Class)
- C — kupe: C238 (E-Class Coupe), C292 (GLE Coupe)
- X — SUV: X253 (GLC, 2016–2022), X167 (GLS)
Edhe këtu ka rifreskim, i shkruar si Facelift. W205 (2014–2018) dhe W205 Facelift (2018–2021) kanë grilla, parakolpe dhe drita që nuk ndërrohen mes vete.
Audi — B, C dhe numri i platformës
- B — A4 dhe A5: B8 (2008–2012), B8.5 (2012–2016), B9 (2016–2019), B9.5 (2020+)
- C — A6 dhe A7: C7 (2011–2014) dhe C7 Facelift (2014–2018), C8 (2018–2023) dhe C8 Facelift (2023+)
- 8-shet — A3: 8P (2003–2012), 8V (2012–2020), 8Y (2020+)
Ai `.5` nuk është shaka. B8 dhe B8.5 janë e njëjta makinë me parakolp, grillë dhe drita krejt tjera.
Volkswagen — thjesht numri
Golf 5, 6, 7, 7.5, 8. Passat me kod si Audi: B7, B8, B8.5.
Golf 7.5 (2017–2020) nuk është Golf 7 me dritë tjetër — parakolpi i përparmë është i ndryshëm, dhe një grillë e Golf 7 nuk hyn te 7.5.
Ku e gjen kodin e makinës sate
Tri mënyra, nga më e shpejta:
- Viti i prodhimit — jo viti i regjistrimit. E ke te libreza.
- VIN-i — te xhami i përparmë ose te korniza e derës. Na e dërgo dhe ta themi ne.
- Na pyet — shkruaj markën, modelin dhe vitin, dhe e gjejmë bashkë.
Në dyqan e ke listën e gjeneratave te filtri: zgjedh markën, pastaj modelin, pastaj gjeneratën me vite. Pas kësaj sheh vetëm çka i shkon asaj makine.
Auto Pjesë Bajrami — Ferizaj, Kosovë. Përshtatjen e konfirmojmë ne para se ta porosisim. Jo me hamendje.